3Jo | BEF | STEP |

YONI Napa 3 Ai koyoto epi'ehina fayahi

3 John

1 Oho, Gaiyasio, nalalu'niga komopa'ni kimi'ohuna bona'ise. Olopa bo kohe'amofita nani fayahi nasana ya'ma koyoto nokumube.

2 Nalalu'niga, komopaka ya'ma monolugu bati huto ni'igo kehelito ana suhi huto kugufaka'mu keke'i meluse ya'iya nasanauba kaitoga i ke'moto meenogo bati huto minalane luto Hu'mamofitoga lulata nohube. 3 Kai kaga lamana'amofihi kapo'aloko bulata nohane. Yana'mu lalalutigihi luga'a enali ete kaga'a lamana'a li pili kolata nohata'mu lu nimigo keheliloto'ni komopa'nigu negelo bilata nohube. 4 Yagapana'nimagi ka lamana'amofihi kapo'alo bati hite bilata nehana kaga'a ya'ma keheliloto komopa'nigu bati huto kehelilata nohunaya ya'ma komopa'nigu keheli bati hilata mone'mofihi yanauba mone be meligilina'mu yabe.

Gaiyasiu enehe'mana'mu fokehi li'ehina

5 Nalalu'niga, nemehi nokumuna bose, kai lalalutigihi enele'mo bati hulata nohata ya'ma lemegesagati ni'igopa fotogati nasana hiti enele'mo bati hulata nohata ya'ma bati huto lolo nohane. 6 To enali foto hepatogati kaitoga neheti'ahana bona'magi Yesuhi bona'amagihi enogobisalo ya'ma komopakatu enehe'molata nohata'mu kofokehi lilata nehabe. To nebinogomo kai ya suhi huto Hu'mamofihi ka'a leli'ali nehana'mu yabe luto minomo buto enehe'moto enoho lifitogo bilana yanauba lamana'a lolo hilibe. 7 Enali Kilisitohi gi'amu yabe lite me'ani he'milete Hu'mamofihi mekeheli'ahana bona'magitogati yogo fe'nohi melise mono foyalo bi'ahanamo ni'ibe. 8 Lali bona'i ya hana'amagihi enehe'moto enele'mo bati hulenogo ka lamana'a i tili tele hilina foyamofihi moneko foyalo bona'i lolo hilabe luto lu leto'ehinamo ni'ibe.

Tiotelefe to Temeteliu etali kaga

9 Nani Kilisitohi yagapana'magihi ya'ma fayahi hupamone'isi mone koyo'ohunaya, Tiotelefeu ai bo enogo'anifita minalube luto lulata nohilina kaga'ni ya'ma keheli he'milata nohibe. 10 Ya'mu nani binogo'ni ai huto moloto nohilinamofihi hapa'a li huto hilibe. Ai lali kumu faga faga luto libe loko hube nohibe. Ya hulata'asigo mone meni'ibe. Mono bona'i nebago ai enele'mo gufaga memolose to luga'amagihi enehe'malune'mu nehago ka epekito ana mono bona'magihi fegutoga enele'mo foto'i mololata nohibe.

11 Nalalu'niga, nemehi nokumuna bose, kai bona'magi enali foipana lolo nehinogomo analo enemege'i memolobo. Ana'ina lamana'a lolo nehinogomo enemege'i malalane. Luga'amagi enali nasana lamana'a lelite nebinogomo enali kumu Hu'mamofitogati huto hi'ahana yabe luto kehelilune. Luga'amagi enali foipa nasana lelite nebinogomo Hu'mamofihi hapa'a bu go fe lite bu mege'ahabe luto ya'ma kehelilune.

12 To Temetelihi hapa'a ya'ma bona'i silaga'i bati huto yabe lite lago kehelune. To mono kapogu mololago ai hapa'a huto hu'ehina'a hetofana ni'ibe. Nani ana huto hapa'a bati hulata nohina abu go'ohube. To ka'a ya'ma lamana'a lulata nohina'a akeheli'ahane.

Bona'i keke'ani lu epolo'ehina

13 Kaga luga'a asaga'i ni'inaya, fayahi koyolata nagamitu fayahi kayalube luto mekehelube. 14 Nani kaitoga bilube luto nolube. Buto nehetilenogo le'abagaguti lu keheli fa keheli huto kehelilu'ibe.

15 Hu'mamofihi fuluna'a ya'ma kaitoga mino moloto mineno. Kigibo kalalukagihi enali keke'i neli ketabe. Kai ana huto ligibo lalalutigihi nehafihe luto keke'i nolu lepolobe luto lu epibo.